రాజ్యసభలో విజయసాయి రెడ్డి ప్రశ్నకు మంత్రి జవాబు
దేశంలో ఎలక్ట్రానిక్స్ ఉత్పత్తుల రంగం శరవేగంగా విస్తరిస్తున్నదని కమ్యూనికేషన్స్‌ శాఖ సహాయ మంత్రి దేవుసింగ్‌ చౌహాన్‌ ప్రకటించారు. రాజ్యసభలో శుక్రవారం వైఎస్సార్సిపి సభ్యులు వి.విజయసాయి రెడ్డి అడిగిన ప్రశ్నకు మంత్రి రాతపూర్వకంగా జవాబిస్తూ ఈ విషయం తెలిపారు. ఎలక్ట్రానిక్స్, టెలికాం నెట్‌వర్కింగ్‌ ఉత్పత్తుల రంగాన్ని ప్రోత్సహించేందుకు ప్రభుత్వం ప్రవేశపెట్టిన ఉత్పత్తి ఆధార ప్రోత్సాహకాల (పిఎల్‌ఐ) పథకం సత్ఫలితాలను ఇస్తోందని చెప్పారు.
టెలికాం నెట్‌వర్కింగ్‌ ఉత్పాదనల రంగం కోసం 2021 జూన్‌లో పిఎల్‌ఐ పథకం ప్రారంభించగా అతి తక్కువ కాలంలోనే దేశంలో టెలికాం ఉత్పత్తుల సంఖ్య గణనీయంగా పెరిగాయని ఆయన తెలిపారు. 2022 అక్టోబర్‌లో ప్రభుత్వం టెలికాం టెక్నాలజి డెవలప్‌మెంట్‌ ఫండ్‌ (టిటిడిఎఫ్‌)ను ప్రారంభించింది. గ్రామీణ, సుదూర ప్రాంతాలలో టెలికాం సేవలు అందిచేందుకు అవసరమైన సాంకేతిక పరిజ్ఞానం, టెలికాం ఉత్పాదనల తయారీపై పరిశోధనలు, అభివృద్ధి చేసే లక్ష్యంతో ప్రారంభించిన టిటిడిఎఫ్‌ కారణంగా స్టార్టప్‌లు, ఎంఎస్‌ఎంఈలు, విద్యా పరిశోధన సంస్థల నుంచి ప్రభుత్వానికి 405 దరఖాస్తులు అందాయి. పరిశీలన అనంతరం అందులోని 8 దరఖాస్తులకు 266 కోట్ల రూపాయల మేరకు ఆమోదించినట్లు మంత్రి వివరించారు.
ప్రభుత్వం చొరవతో చేపట్టిన చర్యల కారణంగా 2014-15లో 1,80,45ల కోట్ల రూపాయలు ఉన్న ఎలక్ట్రానిక్‌ పరికరాల ఉత్పాదన 2022-23 నాటికి 8,22,350 కోట్ల రూపాయలకు చేరుకుంది. సెమికాన్‌ ఇండియా కార్యక్రమం కింద గుజరాత్‌లోని సనద్‌లో దేశంలో తొలి సెమికండక్టర్‌ యూనిట్‌ నిర్మాణం జరుగుతోంది. మరో ప్రముఖ సెమికండక్టర్‌ కంపెనీ బెంగళూరులో సెమికండక్టర్‌ డిజైన్‌ సెంటర్‌ను ఏర్పాటు చేస్తోందని మంత్రి వెల్లడించారు. మరో ప్రముఖ సెమికండక్టర్‌ కంపెనీ సెమికండక్టర్‌ టెక్నాలజీలలో పెద్ద ఎత్తున నిపుణులైన ఇంజనీర్లను తయారు చేసేందుకు ఇండియన్ ఇన్‌నస్టిట్యూట్ ఆఫ్ సైన్స్‌తో ఒప్పందం చేసుకున్నది.
అలాగే 2014-15 మధ్య దేశంలో మొబైల్‌ ఫోన్ల తయారీ 18,900 కోట్ల రూపాయలు ఉండగా 2022-23 నాటికి 3,50,000 కోట్ల రూపాయలకు పెరిగింది. 2014లో 78 శాతం మొబైల్‌ ఫోన్లు దిగుమతి అవుతుండగా మేడిన్ ఇండియా కార్యక్రమం ద్వారా ఈనాటికి 99.2 శాతం మొబైల్‌ ఫోన్ల తయారీ దేశంలోనే జరుగుతోందని మంత్రి వివరించారు.
తూర్పు తీరంలో సమృద్ధిగా మత్స్య సంపద
ఆంధ్రప్రదేశ్ సహా తూర్పు తీర రాష్ట్రాల్లో మత్స్య సంపద నిల్వలు సమృద్ధిగా (97శాతం) ఉన్నట్లు ఇండియన్ కౌన్సిల్ ఫర్ అగ్రికల్చర్ రీసెర్చ్ (ఐసీఏఆర్) – సెంట్రల్ మెరైన్ ఫిషరీస్ రీసెర్చ్ ఇనిస్టిట్యూట్ (సీఎంఎఫ్ఆర్ఐ) ప్రచురించిన మెరైన్ ఫిష్ స్టాక్ స్టేటస్ ఆఫ్ ఇండియా-2022 నివేదికలో పేర్కొన్నట్లు కేంద్ర మత్స్య, పశుసంవర్దక, డైరీయింగ్ శాఖ మంత్రి పర్షోత్తం రూపాల వెల్లడించారు. రాజ్యసభలో విజయసాయి రెడ్డి అడిగిన ప్రశ్నకు మంత్రి జవాబిస్తూ ఆ నివేదికలో ప్రచురించిన విధంగా దేశంలో సమగ్ర సముద్ర చేపల నిల్వల అంచనా ప్రకారం 2022లో దేశవ్యాప్తంగా వివిధ ప్రాంతాల్లో మూల్యాంకణం చేసిన 135 ఫిష్ స్టాక్ ప్రాంతాల్లో 91.1% మంచి నాణ్యత, పరిమాణంలోగల చేపల లభ్యత ఉన్నట్లు తెలిపారు.
మెరైన్ ఫిష్ స్టాక్ స్టేటస్ నివేదిక ప్రకారం దేశంలో సౌత్ ఈస్ట్, నార్త్ ఈస్ట్, సౌత్ వెస్ట్, నార్త్ వెస్ట్, లక్షద్వీప్ సముద్ర ప్రాంతాల్లో మెరైన్ ఫిష్ స్టాక్ స్థితిని అంచనా వేసినట్లు మంత్రి తెలిపారు. సౌత్ ఈస్ట్ తీర ప్రాంతంలో 39 చేపల నిల్వల ప్రాంతాల్లో 97 శాతం లభ్యత ఉన్నట్లు మంత్రి తెలిపారు. అలాగే నార్త్ వెస్ట్ తీర ప్రాంతంలో 37 పిష్‌ స్టాక్స్ లో 83.8%, సౌత్ వెస్ట్ తీర ప్రాంతంలో 41 ఫిష్ స్టాక్స్ లో 92.7%, లక్షద్వీప్ లో 2 ఫిష్ స్టాక్స్ లో 100శాతం, నార్త్ వెస్ట్ లో 37 ఫిష్ స్టాక్స్ లో 87.5%, వెరసి దేశంలో 135 ఫిష్ స్టాక్స్ లో 91.1 శాతం చేపల లభ్యత ఉన్నట్లు మంత్రి తెలిపారు. ఆంధ్రప్రదేశ్, తమిళనాడు, పుదుచ్చేరి వంటి సౌత్ ఈస్ట్ కోస్టల్ రాష్ట్రాల్లో మదింపు కోసం ఫిష్ ల్యాండింగ్స్‌లో లభ్యమవుతున్న చేపల జాతులు, వాటి పరిమాణం, ఎంత తరచుగా లభ్యమవుతున్నాయన్న వివరాలు సేకరించినట్లు తెలిపారు.
దేశంలో ప్రస్తుతం విస్తరించిన ఫిషరీష్ మెనేజ్మెంట్ పాలనా వ్యవస్థ కింద ఆంధ్రప్రదేశ్ తో సహా జాతీయ, ప్రాంతీయ ప్రాముఖ్యత దృష్ట్యా సముద్ర చేపల నిల్వల స్థితి అంచనా వేయడం, సారాశంతో కూడిన పూర్తి సమాచారం అందిండమే నివేదిక ప్రధాన లక్ష్యమని మంత్రి తెలిపారు. మేనేజ్మెంట్ యూనిట్స్ నిర్వచించిన ప్రకారం చేపల పంట స్థాయి, సంమృద్ది ఆధారంగా బయోలాజికల్ స్థిరత్వం కోసం ఫిష్ స్టాక్స్ అంచనా వేస్తున్నట్లు తెలిపారు. అయితే మొరైన్ ఫిష్ స్టాక్ స్టేటస్ ఆప్‌ ఇండియా -2022 స్టడీలో భాగంగా రాష్ట్రాల వారీగా ఫిష్ స్టాక్స్ అంచనా వేయలేదని మంత్రి తెలిపారు. 135 ఫిష్ స్టాక్స్ లో 49 ఫిన్ చేపలు, 21 షెల్ చేపలు వెరసి 70 చేప జాతులకు సంబందించి వేసిన అంచనాలో 91.1శాతం లభ్యత ఉన్నట్లు మంత్రి తెలిపారు.
